Jos 20 | NdeIBE | STEP | Ngakho uJehova wathi kuJoshuwa:

Joshua 20

Amadolobho okuphephela

1 Ngakho uJehova wathi kuJoshuwa:

2 “Tshela abako-Israyeli ukuthi baphawule amadolobho okuphephela njengokulilaya engakwenza ngoMosi, 3 ukuze wonke umuntu obulala omunye umuntu ngengozi njalo engenzi ngabomo ulakho ukubaleka adinge ukuvikelwa kumphindiseli wegazi.

4 “Lapho ebalekela kwelinye lala amadolobho, keme emangenelweni esango ledolobho abesesitsho ukuthi ukhala ngani kubakhokheli bedolobho lelo. Sebezamamukela edolobheni labo besebemnika indawo yokuhlala phakathi kwabo. 5 Uma umphindiseli wegazi emlandela, akumelanga bamnikele lowo owetheswa umlandu ngoba kambulalanga ngabomo njalo langenhliziyo embi. 6 Usezahlala kulelidolobho kuze kufike isikhathi sokuthonisiswa phambi kwebandla njalo kuze kufe umphristi omkhulu oyabe ephethe umsebenzi ngalesosikhathi. Lapho usengabuyela ekhaya lakhe edolobheni abaleka kulo.”

7 Ngakho behlukanisa iKhedeshi eseGalile elizweni lamaqaqa elikaNafthali, iShekemu elizweni lamaqaqa elako-Efrayimi leKhiriyathi Abha (okutsho iHebhroni) elizweni lamaqaqa lakoJuda. 8 Empumalanga yeJodani leJerikho baphawula iBhezeri enkangala esemagcekeni esizwaneni sikaRubheni, iRamothi eseGiliyadi esizwaneni sikaGadi, leGolani eseBhashani esizwaneni sikaManase.

9 Nguloba ngubani owako-Israyeli kumbe omunye owezizweni ohlala phakathi kwabo owabulala omunye umuntu ngengozi angabalekela emadolobheni aqanjiweyo, akumelanga abulawe ngumphindiseli wegazi engakamiswa phambi kwebandla ethonisiswa.